2 Linggó ng 40-Araw – C, 3/16/2025
Leksyonaryo 27
Mga Awit sa Kapistahang Itó
Mga Pagbasa
Pagbasa 1: Genesis 15:5-12, 17-18
Noong mga araw na iyon,inilabas ng Diyós si Abram at sinabi sa kaniyá:
“Masdan mo ang mga bituin!
Mabibilang mo ba iyan?
Ganyan karami ang magiging anak mo at apo."
Nanalig si Abram,
at dahil dito’y kinalugdan siyá ng Panginoón.
Sinabi pa ng Panginoón kay Abram,
“Akó ang kumuha sa iyo sa Ur ng Caldea
upang ibigay sa iyo ang lupaing ito."
Itinanong naman ni Abram,
“Panginoón, aking Diyós,
paano ko malalamang ito’y magiging akin?"
Sinabi sa kaniyá,
“Dalhan mo akó ng isang baka,
isang kambing, at isang tupa,
bawat isa’y tatlong taon ang gulang.
Magdala ka rin ng isang kalapati at isang batu-bato."
Dinala nga ni Abram ang lahát ng iyon
at biniyák ang bawat isa maliban sa mga ibon.
Inihanay niyáng magkakatapat ang pinaghating hayop.
Bumaba ang mga buwitre upang kanin ito,
ngunit itinaboy silá ni Abram.
Nang kumikiling na ang araw,
nakatulog nang mahimbing si Abram,
at nagkaroon ng isang nakatatakót na pangitain.
Pagkalubog ng araw at laganap na ang dilim,
biglang may lumitaw na palayok na umuusok,
at maningas na sulo na dumaan sa pagitan ng pinatay na mga hayop.
At nang araw na yaon,
nakipagtipan ang Panginoón kay Abram,
wika niyá:
“Nangangakó akó na ibibigay sa lahi mo ang lupaing ito,
mula sa hanggahan ng Egipto hanggang sa Ilog-Eufrates."
1147
Tugon sa Salmo: Tugon sa Awit
1148
Salmong Tugunan: Awit 027:1, 7-8a, 8b-9, 13-14
Tanglaw ko’y ang Poon, aking kaligtasan,
kaya walang takót akó kaninuman;
sa mga panganib kaniyáng iingatan,
kaya naman akó’y walang agam-agam.
O Diyós, akó’y dinggin sa aking pagtawag,
lingapin mo akó, sa aki’y mahabag.
Ang paanyaya mo’y “Lumapit sa akin.”
Huwag kang magkukubli’t kita’y hahanapin!
H’wag kang magagalit,
huwag mong itatakwil akóng katulong mo at iyong alipin;
tagapagligtas ko, h’wag akóng lisanin!
Akó’y nananalig na bago mamatay,
masasaksihan ko ang ‘yong kabutihan
na igagawad mo sa mga hinirang.
Sa Panginoóng Diyós tayo’y magtiwala!
Ating patatagin ang paniniwala;
tayo ay umasa sa kaniyáng kalinga!
1149
Pagbasa 2: Sulat kay Filemon 3:17–4:1 or 3:20–4:1
Mga kapatid:Magkaisa kayóng tumulad sa halimbawang ipinakita ko sa inyó.
Kami ang gawin ninyóng huwaran.
Masdan ninyó ang lahát ng sumusunod sa mga halimbawang ito.
Tulad ng malimit kong sabihin sa inyó
– at ngayo’y luhaang inuulit ko
– marami ang namumuhay bilang mga kaaway ng krus ni Kristo.
Kapahamakan ang kahihinatnan nila
sapagkat ang dinidiyós nila ay ang hilig ng kanilang katawan.
Ikinararangal nila ang mga bagay na dapat sana nilang ikahiya
at ang pinag-uukulan lang nila ng pansin ay ang mga bagay na panlupa.
Sa kabilang dakó, ang langit ang tunay nating bayan.
Mula roo’y hinihintay nating may pananabik
ang Panginoóng Hesukristo, ang ating Tagapagligtas.
Pagdating ng araw na yaon,
babaguhin niyá ang ating katawang-lupa at gagawing maluwalhati,
tulad ng kaniyáng katawan,
sa pamamagitan ng kapangyarihang ginamit niyá sa pagpapasuko sa lahát ng bagay.
Kaya nga, minamahal kong mga kapatid
– aking kagalakan at karangalan na lagi kong kinasasabikang makita uli
– magpakatatag kayó sa inyóng pamumuhay na nakaugnay sa Panginoón.
1150
Pambungad:
Sa ulap na maliwanag, ito ang siyáng pahayag, ang D’yos Ama na nangusap: “Ito ang mahal kong Anak, lugod kong dinggin ng lahat.”1151
Magandang Balita: Mabuting Balita ayon kay San Lucas 9:28b-36
Noong panahong iyon:Umakyat si Hesús sa bundok upang manalangin.
Isinama niyá sina Pedro, Juan at Santiago.
Samantalang siyá’y nananalangin,
nagbago ang anyo ng kaniyáng mukha,
nagningning ang kaniyáng kasuutan na naging putingputi.
Di kaginsa-ginsa’y lumitaw ang dalawang lalaki
– sina Moises at Elias na napakitang may kaningningan
– at nakipag-usap sa kaniyá.
Pinag-usapan nila ang nalalapit na pagpanaw ni Hesús na magaganap sa Jerusalem.
Tulog na tulog si Pedro at ang kaniyáng mga kasama,
ngunit silá’y biglang nagising at nakita nila si Hesús na nagniningning at ang dalawang lalaking nakatayo sa tabi niyá.
Nang papaalis na sa tabi ni Hesús ang mga lalaki,
sinabi ni Pedro,
“Guro, mabuti pa’y dumito na tayo.
Gagawa po kami ng tatlong kubol:
isa sa inyó, isa kay Moises, at isa kay Elias."
Ang totoo’y hindi niyá nalalaman ang kaniyáng sinasabi.
Nagsasalita pa siyá nang matakpan silá ng isang ulap,
at silá’y natakót.
At may isang tinig mula sa alapaap na nagsabi,
“Ito ang aking Anak, ang aking Hinirang.
Siyá ang inyóng pakinggan."
Nang tumigil ang tinig,
nakita nilang nag-iisa na si Hesús.
At hindi muna sinabi ng mga alagad kaninuman ang kanilang nakita.
1152
Magandáng Balitŕ Biblia © 1980 Philippine Bible Society. All rights reserved.
Uwian, Ugnay, Yaman, Sinugboanon, Ilocano, Capampangan, Pangasinan
Welcome.
Magsimba. Litúrhiya. Filipino. www.magsimba.com Filipino Catholic Liturgical Resources Since 2006
Please pray for our work and make a donation. Please help. Salamat po.
Ang Aming Pakay: Mga yaman ng Litúrhiyang Tagalog | Litúrhiyang Filipino sa paghahandâ ng lingguhang pagdiriwang sa Misang Tagalog | Misang Filipino, sa Eukaristiya, ng pagliligtás ni Hesús sa atin: mga awit, salmong Tagalog, salmong Filipino, pagbasa sa Filipino | Tagalog.
Our mission: Filipino liturgy | Tagalog liturgy resources for preparing for the Tagalog Mass | Filipino Mass, the weekly celebration in the Eucharist of our redemption by Jesus: Tagalog hymns, Tagalog songs, Tagalog psalms, Tagalog readings, Filipino hymns, Filipino songs, Filipino psalms, Filipino readings, Pilipino hymns, Pilipino songs, Pilipino psalms, Pilipino readings for the Tagalog Eucharist, Filipino Eucharist.
Karapatáng-sipì © 2006-2025 Magsimba Press. Vic Romero, Editor. Nakabukód lahát ang karapatán. All rights reserved. Since 2006-08-04. Dumadalaw kayó mulâ sa IP 18.97.14.87